⊗
Maluk sira,
Benvindu mai iha sítiu Gabinete Fronteiras Terrestres no Marítimas!
Hanesan nasaun marítima ida, ami-nia tasi mak parte integradu ida husi ami-nia moris lorloron no ami-nia identidade. Tasi mós iha nia signifikadu espirítuál mai ami. Tuir lenda, Timoroan sira nia beiala mak lafaek – bainhira lafak ne’e mate, nia isin nakfilak ba illa Timor, nia ruin iha kotuk laran fila-an ba foho sira, no tasi mak fatin lafaek hodi latan nia isin ba.
Timor-Leste iha nasaun viziñu bo’ot rua ne’ebé ho sira nia tasi luan no bo’ot tebes, Indonézia no Austrália. Hafoin restaura tiha ita-nia independénsia iha 2002, Timor-Leste seidauk iha fronteiras marítimas permanentes ho ninia viziñu rua ne’e.
Hafoin tinan barak la-konsege realiza diálogu bilaterál kona-ba fronteiras marítimas ho Austrália, iha tinan 2016 Timor-Leste hili atu halo konsiliasaun obrigatóriu iha Konvensaun Nasoins Unidas kona-ba Direitu Tasi nia okos (UNCLOS, sigla Inglés).
Konsiliasaun obrigatóriu ne’e mak dalan ikus ne’ebé iha ba ita – dezeña ba nasaun sira hanesan ita nian, ne’ebé nasaun viziñu ida lakohi atu ko’alia bilateralmente maibé mós hasés-an tiha husi orgaun hirak ne’ebé bele tesi lia ne’e obrigatóriamente tuir UNCLOS.
Prosesu konsiliasaun obrigatóriu ne’e seidauk iha nasaun ruma mak utiliza ona no la fó garantia katak sei susesu. Maibé, sistema internasionál hatudu ona nia rezultadu mai ita dala ida, no ita determinadu atu koko dala ida tan, liuhusi fiar metin ba iha poder justisa nian.
Hafoin fulan 18, ita konsege hetan duni akordu ida ho Austrália no iha Marsu 2018, ita asina ona Tratadu ida iha Kuartel-Jerál Nasoins Unidas ho sasin Sekretáriu-Jerál António Guterres. “Tratadu entre Repúblika Demokrátika Timor-Leste no Austrália ne’ebé estabelese fronteiras marítimas nasaun rua nian iha Tasi Timor” ratifika ona iha 30 Agostu 2019 iha Díli, liuhusi troka Notas Diplomátika entre Primeiru-Ministru Timor-Leste no Austrália.
Ida-ne’e mak akordu istóriku ida no marka inísiu husi faze foun ida iha relasaun amizade entre Timor-Leste no Austrália.
Maske ita nasaun kiik ida, maibé ita fiar katak susesu ida-ne’e sei hametin liután aplikasaun padraun internasionál no arkitetura jurídiku ne’ebé proteje tasi tomak iha mundu.
Hafoin konklui ona negosiasaun ita-nia fronteira marítima ho Austrália, Timor-Leste agora tenke alkanse delimitasaun fronteira terrestres no marítima ho Indonézia, no negosiasaun fronteira terrestres besik ona atu konklui. Kona-ba fronteiras marítima, nasaun rua konkorda ona katak tenke halo negosiasaun bazeia ba lei internasionál.
Asegura ita-nia direitu soberania ba ita-nia rai no tasi, sei sai hanesan rohan husi Timor-Leste nia luta naruk bai ta-nia soberania kompletu. Ho nune’e ikus mai ita bele goza rikeza no beleza iha ita-nia rai no tasi iha dame no ho dignidade.
Hau fiar katak sítiu ida-ne’e sei sai nu’udar fatin privilejiu ida ba ita hotu atu aprende liután kona-ba ita-nia esforsu sira ba delimitasaun permanente ba ita-nia fronteiras.
Liuhusi servisu hamutuk hanesan ema no nasaun ida mak ita bele garantia ita-nia direitu soberania ba ita-nia rai no tasi.
Kay Rala Xanana Gusmão
Primeiro-Ministro
Hare’e Primeiro-Ministro nia biografia: IHA NE’E (TT)
Website ida ne’e Gabinete Fronteiras Marítimas husi Konsellu ba Delimitasaun Definitiva ba Fronteiras Marítimas fornese hodi fasilita ema sira ne’ebé lee website ida ne’e, atu aprende kona ba Timor-Leste nia luta ba fronteirs marítimas permanente. Konsellu ba Delimitasaun Definitiva ba Fronteiras Marítimas no Gabinete Fronteiras Marítimas la simu responsabilidade legal saida deit ba konfiansa ba informasaun saida deit mak iha website ne’e (inklui link ba dokumentu esternu sira). Informasaun iha ne’e hanesan rezumu deit no la bele foti hanesan akonsellamentu legal. Informasaun ho opiniaun sira hato’o iha website ne’e no informasaun hirak ne’ebé ligadu la reprezenta diplomátiku no la limite ka afeta direitu Konsellu ba Delimitasaun Definitiva ba Fronteiras Marítimas, Gabinete Fronteiras Marítimas, ka Governu Timor-Leste.
Se iha no bele, Gabinete Fronteiras Marítimas fornese anexu no link sira iha lian Tetun.