⊗
Kay Rala Xanana Gusmão mak ukun rezisténsia Timoroan nian ne’ebé lori povu Timor-Leste ba independénsia. Nia mak Prezidente Repúblika dahuluk no tuir mai serbí nu’udar Primeiru-Ministru.
Kay Rala Xanana Gusmão moris iha 20 Juñu 1946 iha Manatuto. Nia eskola iha Eskola Primária Santa Teresa, iha Ossu, Viqueque no Misaun Katólika “Nossa Senhora de Fátima”, iha Dare no iha Eskola Sekundária Dr. Francisco Machado iha Dili.
Xanana Gusmão tama iha administrasaun públika iha 1966 no hola parte iha ezérsitu Português nian husi 1968 to’o 1970. Iha 1974 nia servisu iha jornal “A Voz de Timor” no hola parte ba partidu polítiku Asosiasaun Sosial Demokrata – ASDT, ne’ebé lakleur fila ba FRETILIN, nia hala’o nia kna’ar hanesan Vise Diretor ba Departamentu Informasaun nian.
Tuir fali invazaun militar Indonézia nian iha 1975 no Prezidente FRETILIN nian mate iha 1978, Xanana Gusmão mak asumi fali kna’ar hodi reorganiza luta ne’e. Iha 1981 nia organiza Konferénsia Nasional FRETILIN nian ba dahuluk, ne’ebé nia simu kna’ar hodi lidera Rezisténsia ne’e no sai hanesan Xefe Komandante FALINTIL nian.
Iha Marsu 1983, Xanana Gusmão hahú negosiasaun formal ho Indónezia nia Forsa Armada (ABRI/TNI) ne’ebé hapara tiha tiru-malu to’o fulan Agostu iha tinan ne’e nia laran. Nia hamosu no implementa Polítika Unidade Nasional, dezenvolve Frente Klandestina, no kria Konsellu Nasional Rezisténsia Maubere, ne’ebé ikus mai sai Konsellu Nasional Rezisténsia Timoroan nian (CNRT).
Xanana Gusmão lidera ona luta ba ukun an ne’e liutiha tinan 17 no tinan ida liutiha Masakre Santa Kruz (1991) mak Militar Indonézia nian foin kaer nia iha Dili. Iha 1993 nia simu julgamentu husi tribunal teatru (kangaroo-court trial) no tama ba prizaun iha Semarang, Indonézia, no tuir fali mai iha Cipinang. Iha prizaun, Xanana Gusmão dedika nia tempu tomak hodi halo estratéjia Rezisténsia nian, nune’e mos estuda lian Indonézia, Inglés no lei. Nia mos pinta no hakerek poezia. Iha 1998, Konvensaun Nasional Timorense reafirma fali katak, Xanana Gusmaõ, ne’ebé sei iha hela prizaun, hodi kontinua lidera Rezisténsia Timoroan nian ne’e no mos sai Prezidente CNRT. Indonézia tau nia iha prizaun domisilíaria iha Fevereiru 1999 no nia livre iha 7 Setembru 1999.
Iha 30 Agostu 1999 Timoroan sira bá vota ho apoiu ONU nian, barak tebtebes mak kontra proposta autonómia ne’ebé Indonézia oferese. Votasaun ne’e mak sinal ikus ba okupasaun Indonézia nian iha Timor-Leste no hahú fali prosesu tranzisaun ne’ebé ONU mak lidera.
Iha Agostu 2000, Kongresu Nasional Dahuluk CNRT nian hili Xanana Gusmão sai Prezidente CNRT/Kongresu Nasional. Husi Novembru 2000 to’o Abril 2001, nia hanesan Prezidente Konsellu Nasional, orgaun lejislativa Timoroan deit husi Administrasaun Tranzisaun East Timor nian, iha mos reprezentante sosiedade sivil nian. Hafoin desolve tiha CNRT (Juñu 2001), nia estabelese Asosiasaun Rezisténsia Veteranus, ho objetivu, atu kria kondisaun ba veteranus sira hodi partisipa iha prosesu dezenvolvimentu nasaun nian.
Iha 14 Abril 2002, povu hili Xanana Gusmão hodi sai Prezidente ba Repúblika Demokrátika Timor-Leste nian no simu pose iha 20 Maiu 2002. Nia sai hanesan Prezidente Repúblika to’o nia mandatu hotu iha Maiu 2007. Iha tinan ida ne’e nia simu fali kna’ar hanesan Prezidente ba partidu foun ne’ebé forma ona iha Abril 2007, CNRT – ‘Kongresu Nasional Rekonstrusaun Timor-Leste’. Eleisaun lejislativa ne’e hala’o iha 30 Juñu, ho CNRT simu votus segundu maioria hodi forma aliansa (Aliansa ho Maioria Parlamentar – AMP) ho partidu tolu, PD (Partidu Demokrátiku) no Koligasaun ASDT-PSD. Aliansa ne’e kaer maioria parlamentar no simu konvite hodi forma Governu Konstitusional Dahaat.
Iha Agostu 2007, Xanana Gusmão simu pose hanesan Primeiru-Ministru no Ministru Defeza no Seguransa Repúblika Demokrátika Timor-Leste nian. Nia simu nafatin kna’ar hanesan Primeiru-Ministru iha eleisaun lejislativa 2012 nian. Hanesan Primeiru-Ministru, Xanana Gusmão konsolida dame no unidade nasional, hametin fundasaun demokrátika Estadu nian, investe iha setor importante sira ba ekonomia nian no lidera hodi halo esbosu no konsultasaun ba Planu Dezenvolvimentu Estratéjiku Nasional 2011-2030 nian.
Iha Dezembru 2014, Xanana Gusmão fó sai katak nia sei tun husi nia kargu hanesan Primeiru-Ministru. Governu Konstitusional Daneen hahú servisu iha 16 Fevereiru 2015, hatudu lideransa jerasaun foun nian to’o mai ona. Xanana Gusmão simu pose hanesan Ministru Estratéjiku Planeamentu no Investimentu, pozisaun ida ne’ebé nia kaer to’o Setembru 2017, bainhira Governu Konstitusional Dahitu hahú hala’o sira nia kna’ar.
Governu Dahitu la hetan maioria parlamentar hodi bele aprova Programa Governu nian, nune’e eleisaun lejislativa antesipada halao iha Maiu 2018. Eleisaun ne’e Partidu koligasaun 3 ne’ebé CNRT mak lidera, ho nia Prezidente mak Xanana Gusmão mak manan. Dala ida tan, Xanana Gusmão hili atu la sai Primeiru-Ministru iha Governu Konstitusional Daualu. Líder partidu seluk nian mak hola fali kna’ar ida ne’e, atu nune’e Xanana Gusmão bele haré loos deit ba hakotu fronteiras marítimas permanentes iha Tasi Timor no dezenvolve Greater Sunrise.
Dezde 2010, Xanana Gusmão kaer mos pozisaun hanesan Pesoa Eminente ba Konsellu Asesoria g7+ nian, asosiasaun voluntária ho nasaun 20, ne’ebé esperiénsia ona konflitu ka sei iha hela konflitu, no/ka iha faze tranzisaun ba demokrasia no dezenvolvimentu. Objetivu prinsipal g7+ nian mak, atu fahe esperiénsia no koñesimentu, la’os deit atu reforma sira nia rai rasik maibé buka, mos atu muda maneira komunidade internasional koopera ho Estadu sira ne’ebé frajil no hetan konflitu.
Iha 2016 Governu hili Xanana Gusmão hanesan Xefe Negosiador ba Konsellu Delimitasaun Definitiva Fronteiras Marítimas. Iha nia kna’ar ida ne’e nia lidera negosiasaun ho Austrália, inklui Konsiliasaun Obrigatória tuir UNCLOS, ne’ebé lori to’o Tratadu Fronteira Marítima entre Timor-Leste ho Austrália, ne’ebé ratifika ona iha 30 Agostu 2019. Xanana Gusmão agora servisu ba prosesu hodi estabelese fronteiras marítimas ikus ho Indonézia.
Iha 2018, rekoñese nia matenek, esperiénsia no susesu iha delimitasaun fronteiras marítimas, Governu hili Xanana Gusmão sai hanesan Governu nia Reprezentante Espesial ba negosiasaun fronteira rai nian ho Repúblika Indonézia. Iha 2018 nia mos simu kna’ar hanesan Governu nia Reprezentante Espesial hodi hakotu prosedimentu sira ba ratifikasaun Tratadu entre Timor-Leste ho Austrália hodi estabelese fronteiras marítimas iha Tasi Timor; buka hodi dezenvolve kampu petróleu iha Tasi Timor; no asina akordu sira hodi dezenvolve kampu Greater Sunrise. Nia rezigna-an husi pozisaun ida ikus ne’e iha Jullu 2020.
Xanana Gusmão mos hanesan Governu nia Reprezentante Espesial ba Ekonómia Azul dezde Dezembru 2019. Nia objetivu mak atu koordena advokasia nasional no internasional kona-ba Ekonómia Azul Timor-Leste nian. Nune’e mos, atu lidera esforsu tomak hodi promove no dezenvolve Ekonomia Azul iha Timor-Leste.
Prémiu sira:
2022: Prémiu Literáriu Guerra Junqueiro
2003: Prémiu Dalan ba Dame 2003, Fundasaun Dalan ba Dame
2003: Prémiu “Lideransa ho Integridade” husi International Herald Tribune
2003: Prémiu “Fitun sira Ázia nian” husi Business Week
2002: Prémiu Norte-Sul, Observatóriu Norte-Sul (Uniaun Europeia)
2002: Prémiu Paz Félix Houphouët-Boigny husi UNESCO
2002: Prémiu Labarik sira nian “Amigu Adultu Onoráriu”, Suésia
2000: Prémiu Paz Sydney
1999: Prémiu Sakharov husi Parlamentu Europeu
2000: Prémiu Kwangju Direitus Umanus (Koreia Sul)
1975: Prémiu Dahuluk Konkursu Literáriu iha Timor-Leste
Kondekorasaun sira:
2019: Doutoramentu Onoris Kauza, Universidade Kamboja, Kamboja
2017: Doutoramentu Onoris Kauza, Universidade Funxal, Portugal
2017: Doutoramentu Onoris Kauza, Universidade Hunan, Xina
2015: Doutoramentu Onoris Kauza, Universidade Melbourne, Austrália
2016: Doutoramentu Onoris Kauza, Universidade Waseda, Japaun
2014: Doutoramentu Onoris Kauza, ISCSP, Universidade Téknika Lizboa, Portugal
2014: Doutoramentu Onoris Kauza, Universidade Malázia Sabah, Malázia
2014: Medalla Onra As Liu Indonézia nian, “Bintang Republik Indonesia Adipurna”, husi Prezidente Repúblika Indonézia, S. Exa. Susilo Bambang Yudhoyono
2012: Doutoramentu Onoris Kauza, Universidade Charles Darwin, Austrália
2011: Medalla Klase Dahuluk Orden Vanuatu nian, Vanuatu
2011: Doutoramentu Onoris Kauza, Universidade Koimbra, Portugal
2006: Grande Kolar Orden Don Infante nian, Portugal
2006: Doutoramentu Onoris Kauza, Universidade Takushoku, Japaun
2004: Doutoramentu Onoris Kauza, Universidade Nasional Suncheon, Koreia Sul
2003: Doutoramentu Onoris Kauza, Universidade Vitoria
2003: Onoráriu Grande Kruz husi Orden Saun Miguel no Saun Jorge nian, ho nia Grau Kavaleiru, ne’ebé Liurai Feto Elizabeth II rasik mak entrega
2002: Grande Kolar Orden Kruzeiru Sul, Brazil
2000: Orden Méritu nian, Nova Zelándia
2000: Sidadaun Onoráriu Lizboa nian, Portugal (simu Xave Osamean Sidade Lizboa nian)
2000: Medalla Vise-presidénsia Repúblika Federal Brazil
2000: Orden Méritu José Bonifácio nian, Grau Grão Oficial, Universidade Estadu Riu Janeiru
2000: Doutoramentu Onoris Kauza, Universidade Portu, Portugal
1998: Orden Liberdade nian, Portugal
1995: Sidadaun Onoráriu Brazília nian, Brazil
Atualizasaun ikus: 4 Nov 2022
Website ida ne’e Gabinete Fronteiras Marítimas husi Konsellu ba Delimitasaun Definitiva ba Fronteiras Marítimas fornese hodi fasilita ema sira ne’ebé lee website ida ne’e, atu aprende kona ba Timor-Leste nia luta ba fronteirs marítimas permanente. Konsellu ba Delimitasaun Definitiva ba Fronteiras Marítimas no Gabinete Fronteiras Marítimas la simu responsabilidade legal saida deit ba konfiansa ba informasaun saida deit mak iha website ne’e (inklui link ba dokumentu esternu sira). Informasaun iha ne’e hanesan rezumu deit no la bele foti hanesan akonsellamentu legal. Informasaun ho opiniaun sira hato’o iha website ne’e no informasaun hirak ne’ebé ligadu la reprezenta diplomátiku no la limite ka afeta direitu Konsellu ba Delimitasaun Definitiva ba Fronteiras Marítimas, Gabinete Fronteiras Marítimas, ka Governu Timor-Leste.
Se iha no bele, Gabinete Fronteiras Marítimas fornese anexu no link sira iha lian Tetun.