⊗
Timor-Leste mak nasaun illa ida iha Sudeste Aziátiku. Iha 2002, Timor-Leste sai nu’udar nasaun independente ida no sai membru 191 ba Nasoins Unidas nian.
Estabelese fronteiras marítimas sai hanesan prioridade nasionál ba Timor-Leste.
Iha 2015, Governu Repúblika Demokrátika Timor-Leste estabelese ona Konsellu ba Delimitasaun Definitiva Fronteiras Marítimas ne’ebé ho nia objetivu prinsipál mak estabelese fronteiras marítimas ba nasaun ne’e.
Iha kontextu ida-ne’e, no hafoin prosesu naruk ida hodi define fronteiras marítimas permanente ho Austrália, Timor-Leste inisia ona mekanismu konsiliasaun obrigátoriu iha Konvensaun Nasoins Unidas kona-ba Lei Tasi nian (UNCLOS, sigla inglés) nia okos hodi estabelese fronteiras marítimas permanente ho Austrália.
Iha 30 Agustu 2018, no hafoin prosesu ida-ne’e, “Tratadu entre Repúblika Demokrátika Timor-Leste no Austrália ne’ebé estabelese fronteiras marítimas entre nasaun rua nian iha Tasi Timor” hahú vigora.
Maibé, atu alkanse soberania kompleta, Timor-Leste tenke finaliza ninia fronteiras terrestres no marítimas ho Indonézia.
Iha Dezembru 2023, estabelese ona Gabinete Fronteiras Terrestres no Marítimas hodi troka Konsellu ba Delimitasaun Finál Fronteiras Marítimas, atu define kondisaun nesesáriu no objetivu sira ba preparasaun asinatura tratadu ne’ebé estabelese fronteiras terrestres no marítimas ho Repúblika Indonézia. Kompeténsia espesífiku husi Gabinete Fronteiras Terrestres no Marítimas mós inklui fó apoiu ba Primeiru Ministru hodi hala’o nia funsaun relasiona ho Ekonomia Azul.
Website ida ne’e Gabinete Fronteiras Marítimas husi Konsellu ba Delimitasaun Definitiva ba Fronteiras Marítimas fornese hodi fasilita ema sira ne’ebé lee website ida ne’e, atu aprende kona ba Timor-Leste nia luta ba fronteirs marítimas permanente. Konsellu ba Delimitasaun Definitiva ba Fronteiras Marítimas no Gabinete Fronteiras Marítimas la simu responsabilidade legal saida deit ba konfiansa ba informasaun saida deit mak iha website ne’e (inklui link ba dokumentu esternu sira). Informasaun iha ne’e hanesan rezumu deit no la bele foti hanesan akonsellamentu legal. Informasaun ho opiniaun sira hato’o iha website ne’e no informasaun hirak ne’ebé ligadu la reprezenta diplomátiku no la limite ka afeta direitu Konsellu ba Delimitasaun Definitiva ba Fronteiras Marítimas, Gabinete Fronteiras Marítimas, ka Governu Timor-Leste.
Se iha no bele, Gabinete Fronteiras Marítimas fornese anexu no link sira iha lian Tetun.