⊗
Timor-Leste nasaun foun, soberana ida iha Sudeste Aziátiku, ho populasaun besik 1,2 milloens. Timor-Leste iha nia teritóriu terestres 15.410km², ne’ebé kobre parte lorosa’e illa Timor nian, enklave Oe-Cusse Ambeno no mos illa Jaco no illa Ataúro.
Timor-Leste hanesan Repúblika Demokrátika ida ne’ebé ho sistema lei sivil ida no Parlamentu unikameral ida. Xefe Estadu mak Prezidente Repúblika, ne’ebé eleitu ho votu popular hodi ukun durante tinan lima nia laran. Primeiru-Ministru mak Governu nia ulun ne’ebé hetan apoiu husi Konsellu Ministrus ba assuntu governu nian hotu.
East Timor, mak naran ida ne’ebé ema hatene molok 2002, hanesan kolónia Portugal nian ida husi sékulu 16 to’o Portugal husik hela iha 1975. Iha 1975, funu sivil akontese iha East Timor. Iha 28 novembru 1975, Frente Revolusionária Timor-Leste Independente (FRETILIN) deklara independênsia ba teritóriu ne’e. Hafoin halo tiha deklarasaun ne’e, lakleur deit, Indonézia komesa nia okupasaun iha East Timor. Nasaun ne’e iha Indonézia nia kontrolu durante tinan 24. Iha 30 agostu 1999, realiza duni mehi ne’ebé atu sai husi rai seluk nia ukun bainhira povu timoroan sira vota ba independênsia.
Nasoens Unidas mak administra teritóriu ne’e to restaura fali independênsia iha 20 maiu 2002. Oras ne’e, Timor-Leste sai nasaun ida demokrátika ho dame ne’ebé aproveita tiha ona kresimentu ekonómiku, estabilidade sosial no hafoun fali identidade nasional, lao tuir nafatin nia Planu Dezenvolvimentu Estratéjiku 2011-2030 ba nasaun ida ne’ebé saudavel, edukadu no prospéru.
Website ida ne’e Gabinete Fronteiras Marítimas husi Konsellu ba Delimitasaun Definitiva ba Fronteiras Marítimas fornese hodi fasilita ema sira ne’ebé lee website ida ne’e, atu aprende kona ba Timor-Leste nia luta ba fronteirs marítimas permanente. Konsellu ba Delimitasaun Definitiva ba Fronteiras Marítimas no Gabinete Fronteiras Marítimas la simu responsabilidade legal saida deit ba konfiansa ba informasaun saida deit mak iha website ne’e (inklui link ba dokumentu esternu sira). Informasaun iha ne’e hanesan rezumu deit no la bele foti hanesan akonsellamentu legal. Informasaun ho opiniaun sira hato’o iha website ne’e no informasaun hirak ne’ebé ligadu la reprezenta diplomátiku no la limite ka afeta direitu Konsellu ba Delimitasaun Definitiva ba Fronteiras Marítimas, Gabinete Fronteiras Marítimas, ka Governu Timor-Leste.
Se iha no bele, Gabinete Fronteiras Marítimas fornese anexu no link sira iha lian Tetun.